بفكر اغير اسمي

السلام عليكم ورحمة الله وبركاته
يتجدد موعدنا مع يوميات ناس وناس
الجزء الثاني من السطر العاشر من الجزء الأول
عارف إن السطر طويل جدا بس لازم تقراؤ ع بعضه حتى لو على أيام سيتم طرحه لمدة أسبوع كامل قول رأيك بشده
واختار الجمله اللي عجبتك بجد
واعطي تقدير للسطر بكل صراحه
تعبت ف السطر ده آه تعبت لكن التعب يهون عشان اقدملكم الحقايق وابداع اليوميات رجاء قراءة السطر كامل
وأكثر من مره وده الجزء الثاني الجزء الأول كان إسمه في دنيا الفيس
اما ده
👇👇👇
بعنوان
(بفكر أغير إسمي)

بفكر أغير إسمي
مش راكب ع جسمي
بفكر الف وادور
ما حدش شايفني
بفكر أحط سور
وممكن أغير سني
واحب الغريب آكتر
كرهت إللي مني
كده كده بايعني
دنيا الفيس عجيبه
تقابل ناس غريبه
ناس باسم مستعار
والاسم عليهم عار
وناس عار
ع الاسم المستعار
وناس تغار
من كلمه حلوه ليك
وناس نار
عايزه تاكل إللي حواليك
ناس تغشك في الكلام
وناس متردش السلام
وناس حلوه في الشات
و بتكرهك إنت بالذات
وناس ملايكه ف الجروب
وصبرنا عليهم
صبر أيوب
ونفسها تحدفك بالطوب
مش بس بكلام
ناس داخل تتعلق
وناس داخله تعلق
وناس بجد تفلق الحجر
وناس كمالة عدد
زي الورق ع الشجر
وناس تذم فيك
وناس نفسها تعطيك
الباقي من العمر
وناس فرحانه بوجودك
وناس فرحانه بدمعتك
ع خدودك
وناس تكسر حدودك
وتتكلم اي كلام وخلاص
وناس لاقت الاحساس
إللي غايب عنها
وناس هربانه من ناس
وهما أقرب الناس منها
وإللي يغير إسمه
وإللي يعلق قلب ويفك
واللي فجأه يلاقي بلوك
وإللي شغلانته يشك
مافيش حد يحاسبه
وإللي مختار صورته
وإللي صورته مش هي
وإللي مداري ف صوره
وأحزانه مداريه
وإللي جي يهرج يضحك
وإللي وجوده بقا يزهق

وإللي الضحكه عليه محسوبه
وإللي  بجد ع أمرها مغلوبه
وإللي تحبك حب ملايكه
وإللي بجد ناس رايقه
وإللي يدخلك من طريق
يقول إنه غريق
وهو أصلا بيخطط
وإللي في غيابك بيتنطط
من الفرح
وإللي تحسه صبح وليل
مرح
وإللي عشان اون لاين
يتقال ديما مشغول
وإللي بيفرح لفرح
دول ودول
وإللي نفسه يقولك بحبك
بس خايف من الصدمات
وإللي تحسه مرتاح معاك إنت بالذات
وإللي يحس ان فات الميعاد
وإللي فرحان بذكر الأولاد
وإللي عايش بروح وقلب
والجسد ف مكان تاني
وإللي نفسك تقوله انساني
وإللي لو شوفته
هتختارو تآني
وإللي يبيع في ثواني
وإللي يضرب ناس ف ناس
عشان عدد الجروب يكتر عنده
وإللي فاكر نفسه خلاص
والناس خلاص قرفت منه
وإللي عشان سنه بنحترمه
وإللي مقضيها اعجابات
وإللي كان بينا ومات
وإللي جي يصحي الذكريات
وإللي يقولك مليش غيرك
وهو ديما مع غيرك
وإللي مبسوط بوجودك
وإللي بقا عاشق صوتك
وإللي نفسك تقوله كتر خيرك
وإللي يسأل عليك من غير مقابل
وإللي مستني تسأل عليه
من ده كتير هتقابل
وإللي تبقي جنبه وقت حزنه
ووقت فرحه
متلاقهوش
وإللي أصدقاء فشوش
وإللي لسه ف الناس مشغوش
وإللي ياخد كل صدمه وصدمه
وإللي من الصدمات بينتقم
وإللي يخرج من صدمه
يرجع تاني يتصدم
وإللي روحه تلاقت بروح
وإللي نفسه عن الناس يروح بعيد
وإللي يشوفك نفسه يبوسك ووجودك ليه
بقا عيد
وإللي فرحانه باي مناسبه
وإللي بينشر همه النسبه
نسبة التعليق
وإللي جي غريق
واول ما يفوق
إنت أول واحد ياكل فيك
وإللي يلعب بالمشاعر
وإللي شاعر من يومه
وإللي مداري الهم ف نومه
وإللي تجمع الأصدقاء بقا همه
وإللي بيطعن في دمه
وإللي ينط ف اللي مش ليه
وإللي سكرين شوت
بقا سلاح ليه
وإللي يضحك عليك وإنت راضي
وإللي ينسى بيك الماضي
وإللي موجود ع الفاضي
ملوش اي لزمه
وإللي وجوده مسببلك ازمه
وإللي نفسك تتضربه
بالجزمه
وناس داخله تتدور ع ستات
و معاكسه ف الكومنتات
وكل الناس بتحكي ع الخيانه

طب يا جماعه مين إللي خان

وناس همها تجمع حواليها الرجال
مبقاش فيس بقى بركان
وناس عشان تكسبك تطعن ف غيرك
وناس مع غيرك بتتطعن فيك
وناس بيك من غيرك
عايشين
وناس مانتمه نعم مانتمه
كل آتنين مع بعض يعني
وناس منتنه نعم ريحتها
وحشه م كتر الكلام ع الناس
وناس الغش عندها أساس
وناس سمعتها ذهب وماس
وناس قلوبها نظيفه
وناس قلوبها خفيفه
وناس ف المشاعر ضعيفه
وناس في خطف القلوب حريفه

وناس زي العطور والروايح
وناس غاوي فضايح
وناس جاي لوحده سايح
وناس تديك نصايح
وناس في الكدب طايح
وناس عليك جاي ورايح
كلام كتير بيتقال
الكلام للنساء والرجال
إللي يقولك الرجال ذئاب
قوله النساء هن من صنعتهن
إللي يقولك بلاش كلام واقفل الباب
قوله ف الوحده لا أكن
وبكده أظن قولنا كل حاجه
عن الفيس وكلامه
عن حربه وسلامه

وناس كلامها رصاص
وناس نايمه ف الخاص
وناس غاليه وناس رخاص
وناس متعرفش الاخلاص
وناس جميلة الاحساس
وناس بجد خلاص
ماتت وناس تابت
وناس دأبت وناس شابت
وناس هاتت وناس هانت
وناس ذادت وناس فاتت
وناس عايشه وخلاص
وناس من دمنا
وناس تهمنا
وناس بقت مننا
وناس مننا مجروحين
وناس همها طين
وناس مخدوعين
وناس مش عارفه رايحه ع فين
وناس عندها من الالفين
أصدقاء
وكل يوم وداع والى اللقاء
وناس لا للبقاء
وناس قلوبهم صفاء
وناس كلامهم دواء
وناس لينا هواء
وناس بتدور على حب
وناس عميانه القلب
وناس بجد تتحب
وناس عليك تقلب

وناس عايزه تشرب م دمي
وناس طمعانه في جسمي
وناس مجنونه رسمي
وأنا بفكر أغير إسمي
#علي_التركي ♥️ ♥️